اصير ارهابي لجلك! الشاعر مصطفى العراقي

غصبن عالزمن!!!




الك ضحكة بشفافك ضاوية إمن اسنين
اَشوفن دمعتك طفتها بالكوه!!!

صديقي اشبيك هذا الهم اجاك امنين!
لا تنقهر هاي الدنيا ما تسوه

عليمن تحرك ابروحك ضحكتك وين!
ياهو الغاثك بس كلي من هوه!

اوصَله لون ايصير بارض الصين
واصير اكبال وجهه وانسف العبوه

اصير ارهابي لاجلك واحرك الصوبين
ولا اخلي اليغثك دنيته حلوه!

يالله ابتسم لتبين ادموع العين
لتشمت الشامت بيك وتكَوه

إذا محتار اصيرلك الراي الزين
تدري ابحيرتك عد صاحبك بلوه

وإذا مهموم من الكِبر هاك اسنين
اخذ عمري العمر من دونك اشيسوه

وإذا ابنفسك اشياء وغالية التثمين!
بس اَشر واجيبنهن الك فدوه

وإذا عطشان ما شربك من النهرين!
اشربك ماي عيني الحد متتروه

فضلك سابق الينسه الفضل موزين
الك عندي مواقف كلهن امروه

اَذكر من طحت يمك قبل سنتين
على راسك شلتني يا ابو النخوه

لجازيك اَنه اليوم امجازه الموافين
وطفي نارك المن عدها تتجوه

بسيطه وداعتك لا تنقهر يازين
كلشي اتريده اجيبه اعله الزمن كوه

اليوم اليوم اجازيك اَوَفي الدين
امس من ضَلمت وجهك علي ضوه

غصبن عالزمن غصبن على الطاغين
ارجع ضحكتك يل ضحكتك غنوه

شكرا